Hörn Hrafnsdóttir mezzo-sópran stundaði nám við Tónlistarskóla Kópavogs og lauk áttunda stigi í söng frá Söngskólanum í Reykjavík. Kennarar hennar þar voru afi hennar, Einar Sturluson, og Elín Ósk Óskarsdóttir. Síðastliðin ár hefur Hörn sótt tíma til Elínar og ýmis námskeið og söngtíma, meðal annars í Vínarborg, Edinborg, Lundúnum og á Ítalíu. Hörn útskrifaðist sem byggingaverkfræðingur frá Háskóla Íslands árið 1997 og lauk meistaranámi í vatnsauðlindaverkfræði frá Heriot Watt University í Edinborg árið 2001. Hún starfar hjá Verkís í Reykjavík.
   Árið 2007 var Hörn meðal fyrstu verðlaunahafa í alþjóðlegu söngvarakeppninni Barry Alexander International Vocal Competition í New York borg og í kjölfar þess söng hún einsöng á tvennum tónleikum í Carnegie Hall þar í borg. Hörn hefur komið víða fram sem einsöngvari, beggja vegna Atlantshafsins og í mars síðastliðnum söng Hörn hlutverk Amneris á sviðsettum tónleikum Íslensku Óperunnar úr Aida eftir Verdi. Hún er ein af stofnendum Óp-hópsins sem heldur mánaðarlega hádegistónleika í Íslensku Óperunni. Hörn vinnur nú að útgáfu ljóðasöngsdisks.

Margrét Grétarsdóttir lærði söng hjá Elínu Ósk Óskarsdóttur við Söngskólann í Reykjavík og sótti síðar einkatíma hjá henni. Hún stundaði nám um skeið hjá Franco Castellana á Ítalíu og hefur sótt námskeið, meðal annars hjá Galina Pisarenko, Anton Steingruber, Robin Stapleton og Catherine Sadolin. Árið 2008 lauk hún eins árs diplomanámi hjá Complete Vocal Institute í Kaupmannahöfn.
   Í lok árs 2007 vann hún önnur verðlaun í hinni þekktu söngvarakeppni Barry Alexander International Vocal Competition í New York borg. Margrét hefur víða komið fram sem einsöngvari, með kórum og í óperuhlutverkum, meðal annars sem ein brúðarmærin í Galdraskyttunni eftir Carl Von Weber, í Suor Angelica eftir Puccini og Cavalleria Rusticana eftir Mascagni. Af trúarlegri tónlist hefur hún meðal annars sungið einsöngsverkin í Beatus Vir og Gloria eftir Vivaldi, Requiem eftir Fauré og Messu í G-dúr eftir Schubert. Ásamt starfi sínu sem söngkona kennir Margrét söng og leik hjá Sönglist í Borgarleikhúsinu.

Svana Berglind Karlsdóttir er fædd og uppalin á Sauðárkróki og hóf tónlistarnám sitt við tónlistarskólann þar. Á árunum 1991–93 var hún við nám hjá Augusto Frati í Flórens á Ítalíu og haustið 1994 hóf hún nám við Söngskólann í Reykjavík þar sem hún naut leiðsagnar Snæbjargar Snæbjarnardóttur og síðar Elínar Óskar Óskarsdóttur og til hennar hefur hún einnig sótt tíma síðastliðin ár. Hún lauk burtfararprófi þaðan árið 1999 og hélt áfram námi við kennaradeild skólans uns hún snéri aftur til náms á Ítalíu undir leiðsögn Massimo Sardi. Hún hefur einnig sótt ýmis námskeið, meðal annars þrívegis hjá hljómsveitarstjóranum Martin Isepp.
   Svana Berglind fór með ýmis hlutverk í uppfærslum hjá óperudeild Söngskólans, meðal annars hlutverk Fyrstu hirðmeyjar í Töfraflautunni, Systur Genovieffa í Suor Angelica og Rosalinda í Leðurblökunni. Hún hefur haldið fjölda einsöngstónleika og komið fram við margvísleg tækifæri, ýmist ein eða með kórum, innanlands og erlendis, meðal annars á Ítalíu, Búlgaríu og í Noregi.

Hólmfríður Sigurðardóttir hóf píanónám sitt í Tónlistarskóla Ísafjarðar þar sem Ragnar H. Ragnar var aðalkennari hennar. Hún lærði síðan í Tónlistarháskólanum í München og lauk þaðan einleikara- og kennaraprófi.
   Að námi loknu settist hún að í Reykjavík og hóf störf við kennslu og píanóleik. Hún fór fljótlega að leika með söngvurum og hefur það verið aðalstarf hennar síðan, sem meðleikari við Söngskólann í Reykjavík og með kórum og söngvurum á tónleikum hér heima og erlendis.

Söngtríóið Sopranos var stofnað sumarið 2004 og hefur haldið fjölda tónleika og skemmt landanum innan lands sem utan. Stúlkurnar leggja mikla vinnu í tónlistina og útsetja allt sjálfar. Þær eru þekktar fyrir að undirstrika leikræna þáttinn í flutningi sínum og eru því oft mjög skrautlegar, skemmtilegar - og að sjálfsögðu dramatískar á köflum.