Mathias Susaas Halvorsen fæddist í Haugasundi í Noregi 1988. Hann stundaði píanónám við Barratt Due Musikkinstitutt í Ósló undir handleiðslu tékkneska prófessorsins Jiri Hlinka og útskrifaðist þaðan með BA gráðu síðastliðið vor. Hann hefur komið fram með mörgum virtum tónlistarmönnum, þar á meðal Gintaras Rinkevicius, Benedict Klöckner og Tine Thing Helseth og á mörgum hátíðum, svo sem Festspillene i Hardanger, København Kammermusikfestival, Festspillene i Bergen og einnig í Þýskalandi, Bretlandi og á Íslandi. Þá hefur hann leikið einleik í virtum tónleikasölum eins og Oslo Konserthus og St. John's Smith Square í Lundúnum. Árið 2008 stofnaði hann, ásamt flautuleikaranum Guro Pettersen, Podium kammermúsíkhátíðina í Haugesund.
    Mathias hlaut þriðju verðlaun sem píanódúóið Duo Arctica, ásamt Joachim Carr í alþjóðlegu Grieg keppninni árið 2008 og hafa þeir síðan komið fram í Þýskalandi, Ísrael og á Íslandi. Vorið 2009 flutti hann fimmta píanókonsert norska tónskáldsins Halfdan Cleve með Litháísku ríkissinfóníuhljómsveitinni.

Eygló Dóra Davíðsdóttir er fædd 1988 og hóf að læra á fiðlu fimm ára gömul hjá Lilju Hjaltadóttur og síðar Auði Hafsteinsdóttur. Samhliða menntaskóla stundaði hún nám við Listaháskóla Íslands, en eftir þriggja ára nám þar flutti hún til Berlínar og sótti einkatíma í fiðluleik hjá Stephan Picard prófessor. Nú nemur hún við tónlistarháskólann í Lübeck hjá Elisabeth Weber prófessor. Hún hefur tekið þátt í námskeiðum víða um Evrópu, hjá listamönnum eins og Nikolaj Znaider, Thomas Brandis og Sigurbirni Bernharðssyni.
   Árið 2006 tók Eygló Dóra þátt í keppni Listaháskóla Íslands og Sinfóníuhljómsveitar Íslands; Ungir einleikarar og hlotnaðist í kjölfarið að leika einleik með Sinfóníuhljómsveitinni. Hún er virkur kammermúsíkant, hefur leikið með Mendelssohn Kammerorchester í Leipzig, Bach sveitinni í Skálholti og Strengjasveitinni Skark, og komið fram á hátíðum eins og Brahms-festival í Lübeck og Tónlistarhátíð unga fólksins. Hún er lausráðinn fiðluleikari hjá Sinfóníuhljómsveit Íslands.

Magnus Boye Hansen er fæddur 1988 í Noregi og hefur spilað á fiðlu frá sjö ára aldri. Hann nemur nú hjá Geir Inge Lotsberg við Barratt Due Musikkinstitutt í Ósló og stefnir á að ljúka BA gráðu þaðan í vor. Hann hefur spilað fyrir hina ýmsu kennara, þar á meðal Piotr Janowski, Gordon Back, Dora Schwarzberg, Michaela Martin og Mauricio Fuks, og komið fram á tónlistarhátíðum t.d. Risør Kammermusikfestival, Podium Festival Haugesund og Podium Festival Esslingen. Hann spilar reglulega með strengjasveitinni Kammer Allegria og í nóvember 2008 lék hann einleik, Concerto Grosso eftir Alfred Schnittke, með Oslo Camerata. Í haust mun hann fara í tónleikaferðalag með Risør Kammermusikfestival og leika, meðal annars í Carnegie Hall með listamönnum á borð við Martin Fröst, Leif Ove Andsnes og Marc André Hamlin.
   Magnus leikur á fiðlu sem Nicolas Gilles smíðaði árið 2008. Hana fékk hann léða frá Dextra Musica hljóðfærasjóðnum eftir að hafa unnið keppni sjóðsins um hljóðfærið.

Mischa Pfeiffer er fæddur 1985 í Baden-Württemberg og stundaði framhaldsnám í lágfiðluleik hjá Thomas Selditz við Tónlistarháskólann í Hamburg og frá árinu 2008 hjá Barböru Westphal í Tónlistarháskólanum í Lübeck þaðan sem hann stefnir á að ljúka námi nú í sumar.
    Mischa hefur sótt námskeið hjá Roland Glassl, Thomas Riebl og Tatjana Masurenko og numið kammertónlist hjá listamönnum eins og Arnold Steihardt, Valentin Erben og Samuel Rhodes. Á tónleikaferðum sínum hefur hann leikið í Kína, Japan og víða um Evrópu. Hann kemur reglulega fram á Podium Festival Esslingen.

Þorgerður Edda Hall sellóleikari er fædd 1989 í Reykjavík og hóf tónlistarnám sitt við Tónskóla Sigursveins D. Kristinssonar. Haustið 2006 innritaðist hún á Diplomabraut Listaháskóla Íslands hjá Gunnari Kvaran prófessor og útskrifaðist þaðan vorið 2008. Veturinn 2008–09 stundaði hún nám við Barratt Due Musikkinstitutt í Ósló undir handleiðslu Bjørns Solum. Síðastliðinn vetur stundaði hún nám við Listaháskóla Íslands og lauk B.Mus. gráðu þaðan í vor.
    Þorgerður hefur stundað ýmis konar tónlistariðkan og hefur leikið með strengjakvartett, bæði hérlendis og á hinum Norðurlöndunum. Hún hefur tekið þátt í hljómsveitar- og kammerverkefnum, meðal annars á Tónlistarhátíð unga fólksins, með listamönnum á borð við Nikolaj Znaider, Krzysztof Penderecki og Sigurbjörn Bernharðsson.