Að loknu tónmenntakennaraprófi og söngprófi frá Tónlistarskólanum í Reykjavík hélt Jóhanna Halldórsdóttir til Þýskalands og hóf nám við Tónlistarháskólann í Trossingen þar sem hún sérhæfði sig í flutningi á barokk og endurreisnartónlist. Jóhanna hefur tekið þátt í ýmsum námskeiðum hjá tónlistarmönnum á sviði barokk og endurreisnar, meðal þeirra eru Jill Feldmann, Rolf Lislevand, Lars Ulrik Mortenssen og Richard Wistreich. Jóhanna kemur reglulega fram með ýmsum tónlistarhópum í Þýskalandi og Sviss bæði sem einsöngvari og þátttakandi í kammertónlist. Hún hefur m. a. starfað með Lukas Barockensemble í Stuttgart, L'arpa Festante í München og Collegium Vokale í Zürich. Síðastliðið sumar var hún ráðin söngkona við þýska tónlistarhópinn Penalosa Ensemble sem sérhæfir sig í að flytja endurreisnartónlist. Jóhanna syngur með Rinascente hópnum sem starfar við Neskirkju í Reykjavík.

Heike ter Stal er fædd í Aachen í Þýskalandi. Hún fékk snemma mikinn áhuga á gítarleik og stundaði gítarnám og nám í tónlistarkennslufræðum við Tónlistarháskólann í Hannover. Að því námi loknu fór áhugi hennar á sögulegum strengjahljóðfærum barokk- og endurreisnartímans sífellt vaxandi og árið 1996 hóf hún formlegt nám á lútu og teorba (chittarone) við Alte Musik deild Tónlistarháskólans í Trossingen í Þýskalandi með prófessor Rolf Lislevand sem aðalkennara. Heike kemur reglulega fram með ýmsum af virtustu tónlistarhópum í Þýskalandi á sviði barokk- og endurreisnartónlistar og er eftirsóttur continuoleikari og einleikari víða um Evrópu.

Steinunn Arnbjörg Stefánsdóttir hóf sellónám hjá Hauki Hannessyni. Hún lærði síðar hjá Gunnari Kvaran og lauk einleikaraprófi frá Tónlistarskólanum í Reykjavík árið 2000. Þá hélt hún til náms í París hjá Michel Strauss við le Conservatoire National de Region de Boulogne-Billancourt. Frá haustinu 2003 hefur hún lagt stund á barokksellónám hjá Christoph Cion og Bruno Cocset við le Conservatoire National Superieur de Musique de Paris, sem og kammertónlist, gregorsöng, barokkdans og sitthvað fleira. Ytra leikur hún með ýmsum hópum, sér í lagi barokk og spunatónlist. Hér heima hefur hún m.a. leikið með Sinfóníuhljómsveit Íslands og Sinfóníuhljómsveit Norðurlands og leikur nú með kammersveitinni Ísafold.

Guðrún Óskarsdóttir lauk píanókennaraprófi frá Tónlistarskólanum í Reykjavík og nam að því loknu semballeik hjá Helgu Ingólfsdóttur. Framhaldsnám stundaði hún hjá Annette Uittenbosch við Sweelinck Conservatorium í Amsterdam, hjá Jesper Böje Christensen við Scola Cantorum í Basel og hjá Francoise Langéll í París. Guðrún hefur leikið inn á hljómdiska og komið fram sem einleikari, meðleikari og þátttakandi í kammertónlist á fjölmörgum tónleikum á Íslandi og víða í Evrópu. Hún hefur unnið með Íslenska dansflokknum og hjá Íslensku Óperunni og spilar reglulega með Bach- sveitinni í Skálholti, Caput hópnum, Kammersveit Reykjavíkur og Sinfóníuhljómsveit Íslands.