Á þriðjudagstónleikum í Listasafni Sigurjóns 6. júlí kl. 20:30 flytja þau Laufey Sigurðardóttir og Páll Eyjólfsson tónverk frá ýmsum tímum á fiðlu og gítar. Á efnisskrá eru verk eftir Vivaldi, Paganini, Chopin, K. Blak og Vivaldi og hefur Páll útsett sum verkanna fyrir fiðlu og gítar.

Laufey Sigurðardóttir fiðluleikari og Páll Eyjólfsson gítarleikari hafa starfað saman frá 1986. Bæði stunduðu framhaldsnám erlendis að loknu einleikaraprófi í Reykjavík, Laufey í Bandaríkjunum og á Ítalíu, en Páll á Spáni. Þau eru virkir þátttakendur í íslensku tónlistarlífi og Laufey er fastráðin hjá Sinfóníuhljómsveit Íslands. Saman hafa þau komið fram á tónlistarhátíðum í Færeyjum og á Spáni, og haldið tónleika meðal annars í Finnlandi og Danmörku. Á efnisskrá þeirra eru verk frá barokk-tímanum til okkar daga og íslensk tónskáld hafa samið verk fyrir þau sérstaklega. Auk venjulegs tónleikahalds hafa Páll og Laufey gert upptökur fyrir útvarp og sjónvarp og staðið fyrir tónlistarkynningum í skólum víðs vegar um landið, m.a. á vegum Tónlist fyrir alla. Árið 1996 kom út á vegum SKREFS geisladiskurinn Ítölsk tónlist, í röðinni íslenskir einleikarar, með samleik þeirra.