|
Fréttatilkynning frá Listasafni Sigurjóns
Ólafssonar 22.01.25 „Mitt Laugarnes“ 
Á þriðja fræðslukvöldi sem haldið er undir merkjum
Friðlýsum Laugarnes fjallar Þorgrímur
Gestsson um persónuleg tengsl sín við Laugarnes og
rekur aðdraganda þess að hann fór að kynna sér
þúsund ára sögu Laugarness, sem varð að lokum að
bókinni „Mannlíf við Sund − býlið,
byggðin og borgin“ sem kom út 1998 og var endurútgefin
12 árum síðar.
Þorgrímur mun segja frá því hvernig jarðeignin gekk á milli kynslóða sömu ættar öldum saman og hvers vegna aðsetur biskups var að lokum flutt þangað. Þá reynir hann að gera grein fyrir tilfinningu sinni fyrir sjálfu Laugarnesþorpinu og hvernig borgin gleypti það. Nú stendur bæjarhóllinn einn eftir, heldur kollóttur, og horfur eru á að samtíminn eigi eftir að slétta yfir spor þúsund ára mannlífs þar sem enn má þó sjá glitta í. Fyrirlesturinn verður að vanda í Listasafni Sigurjóns Ólafssonar og hefst klukkan 20 þriðjudagskvöldið 28. janúar 2025. Þorgrímur Gestsson hefur starfað sem blaðamaður, kennari, ritstjóri og rithöfundur. Hann hefur gert útvarpsþætti um sögulegt efni og pistla um ferðir um fornsagnaslóðir í Noregi, Færeyjum og Orkneyjum. Eftir hann liggur einnig fjöldi rita um sögulegt efni, meðal annars um verkalýð og vinnurétt auk fyrrgreinds rits um Laugarnes. Faðir hans, Gestur Þorgrímsson ólst upp í Laugarnesi og telur Þorgrímur ætíð rætur síðan þaðan. Á fjórða fræðslukvöldi Friðlýsum Laugarnes, þriðjudagskvöldið 18. febrúar, segir Stefán Pálsson sagnfræðingur frá fjölskyldu sem kom til landsins 1926 með dýrgarð með sér og settist að í Laugarnesi. Því var slegið föstu að um sígauna væri að ræða. | |
| |