Fréttatilkynning frá Listasafni Sigurjóns
Ólafssonar 08.01.25
Listasafn Sigurjóns Ólafssonar hefur starf sitt á þessu ári með röð
fyrirlestra undir heitinu Friðlýsum Laugarnes og stendur jafnframt fyrir
söfnun undirskrifta til að skora á ráðherra umhverfismála
að friðlýsa Laugarnes sem búsetu- og menningarlandslag.
Fyrstu fyrirlestrarnir verða þriðjudagskvöldið 14. janúar klukkan 20:00. Þar segir Guðmundur Þórhallsson frá aðdraganda að byggingu Holdsveikraspítalans á Laugarnesi sem starfaði á árunum 1898 til 1943. Inn í þá sögu fléttist stofnun Oddfellowreglunnar á Íslandi árið 1897. Í erindi sínu Lífið á Holdsveikraspítalanum í Laugarnesi fjallar Erla Dóris Halldórsdóttir sagnfræðingur um starfið á spítalanum og hvernig tókst að vinna bug á þessum hræðilega sjúkdómi. Þriðjudaginn 21 janúar segir Árni Árnason frá þeirri niðurstöðu rannsóknar sinnar að Ingólfur Arnarson hafi byggt bæ sinn í Laugarnesi, en ekki á jörðinni Vík og viku síðar fjallar Þorgrímur Gestsson um Laugarnesið, eigin tengsl og sögu þess allt frá Landnámi. | |
| |