|
Fréttatilkynning frá Listasafni Sigurjóns
Ólafssonar 20.03.24
Söngtónleikar
Rómantík í Listasafni Sigurjóns þriðjudagskvöldið
26. mars kl. 20:00
Sólrún Bragadóttir sópran og Jón Sigurðsson píanó 
Á næstu þriðjudagstónleikum í
Listasafni Sigurjóns Ólafssonar flytja þau
Sólrún Bragadóttir sópransöngkona og
Jón Sigurðsson píanóleikari úrval sönglaga sem
tengjast tónmáli síðrómantíska tímans.
Má þar nefna Sex söngva eftir Jean Sibelius við ljóð Johans Runeberg og þrjú sönglög eftir Hugo Wolf. Einnig flytja þau verk eftir Reynaldo Hahn, Henri Duparc, Richard Strauss, Ernest Chausson og Francis Poulenc. Verk þessi sýna sterkar tilfinningar og skarpar andstæður og draga fram, ýmist djúpan trega eða leikandi gleði. Fjölbreytt efnistök á svipuðum viðfangsefnum sýnir vel hversu ríkulegur sönglagaarfurinn er. Að loknu námi hérlendis lauk Sólrún Bragadóttir meistaragráðu í einsöng og kennslu frá tónlistarháskólanum í Bloomington í Indiana. Meðal kennara hennar þar var hin þekkta rúmenska söngkona Virginia Zeani. Sólrún hefur starfað við helstu óperu- og leikhús í Þýskalandi, til dæmis í Kaiserlautern, Hannover, Düsseldorf, Mannheim, München, Karlsruhe, Kiel, Kassel, Heidelberg og einnig í Belfast, Avignon, Liége, Bern, Palm Beach, Tsuyama í Japan og víðar. Meðal hlutverka hennar má nefna Mimi í La Bohème, Suor Angelica í samnefndri óperu, Desdemona í Otello, Gilda í Rigoletto, Elísabet í Don Carlo, Greifafrúna í Brúðkaupi Fígarós, Pamínu í Töfraflautunni og Fiordiligi í Così fan tutte. Þá hefur hún einnig oft komið fram sem einsöngvari með hljómsveitum, sungið ljóðatónlist, óratoríur og Vínartónlist. Haustið 2022 flutti Sólrún heim til Íslands eftir langa dvöl erlendis og kemur fram sem klassískur söngvari með fjölbreyttum efniviði, en starfar einnig sem raddþjálfari fyrir kóra og einsöngvara, þerapisti og reikimeistari. Sólrún er reikimeistari og þerapisti í aðferð sem kallast Joyful Evolution. Kennsla hennar er í formi námskeiða og einnig einstaklingsmiðuð með áherslu á heildrænar þarfir nemanda. Kennslan er hugsuð fyrir alla, laglausa sem lagvissa. Þá hefur hún þróað ferli sem hún kallar Söngheilun og byggist á djúpri hugleiðslu og söngspuna, jafnvel án undirleiks þar sem engin er dagskráin heldur valið á staðnum og ýmist sungið án orða, í spuna eða heil lög af ýmsu tagi. Sólrún býður upp á sérstaka raddþjálfun sem hún kallar Sálarflæðissöng, eða -tón, sem byggir ekki eingöngu á raddtækni og áralangri reynslu á sviði, heldur einnig á vinnu með heilun raddarinnar. Jón Sigurðsson píanóleikari stundaði nám við Tónlistarskólann í Reykjavík, Söngskóla Sigurðar Demetz og Arizona State University í Bandaríkjunum. Einnig hefur hann kynnt sér Funktionale Methode. Helstu kennarar hans hafa verið Helga Laxness, Halldór Haraldsson, Erika Haase, Gerrit Schuil og Caio Pagano. Hann hefur einnig tekið þátt í opnum kennslustundum hjá Ruth Slenczynska, Edith-Picht Axenfeld og Roger Woodward. Á undanförnum árum hefur Jón leikið víða, bæði á Íslandi og víðar í Evrópu, og einnig í Bandaríkjunum. Þá hefur hann flutt ýmiss konar tónlist, en þó hafa rómantísk og nútímaverk alltaf skipað stóran sess hjá honum. Jón heldur einleikstónleika reglulega, hefur leikið píanókonserta eftir Beethoven og Mozart og komfram með kammersveitum og fjölmörgum hljóðfæraleikurum og söngvurum. Jón hefur leikið inn á þrjá geisladiska sem gefnir voru út hjá Polarfonia Classics. Á þeim er að finna verk, meðal annars eftir Scriabin og Barber og sónötur eftir Strauss, Schumann og Mozart. | |
|