|
Fréttatilkynning frá Listasafni Sigurjóns
Ólafssonar 12.03.24 „Frá Svartárkoti til Huldu á
Skútustöðum með viðkomu í
Stafnsholti“ Viðar Hreinsson bókmenntafræðingur fjallar um umhverfishugvísindi og þjóðleg fræði í Listasafni Sigurjóns Ólafssonar næstkomandi þriðjudagskvöld, 19. mars 2024 kl. 20:00 
Í Suður-Þingeyjarsýslu hefur verið öflugt
menningarlíf allt frá miðri 19. öld og er svo enn í dag.
Rannsóknarsetrið Svartárkot,
menning − náttúra „grasrótarsetur í
heimabyggð“ hóf starfsemi í Bárðardal árið
2007 og hefur staðið að rannsóknum og haldið mörg
alþjóðleg námskeið síðan.
Menningarfélagið Gjallandi var
stofnað í Mývatnssveit árið 2014 og hefur
staðið fyrir bókmenntakvöldum,
myndlistarsýningum og fleiru slíku. Sumarið 2021 var
náttúruhugvísindasetrið
HULDA sett á fót sem
samstarfsvettvangur vegna stofnunar nýs
rannsóknarseturs Háskóla Íslands í
Þingeyjarsveit. Að baki HULDU standa Háskóli
Íslands og Svartárkotssetrið í samstarfi við
Þingeyjarsveit og starfsstöð hennar er á
Skútustöðum í Mývatnssveit.Í erindi sínu mun Viðar, sem er einn stofnenda og helsti fræðimaður Svartárkotssetursins, fjalla um Svartárkots- og Hulduverkefnin og tengja saman alþjóðleg umhverfishugvísindi og þjóðleg fræði landsbyggðarinnar. Spjallið verður kryddað með sögum af Helga Jónssyni frá Stafnsholti á Fljótsheiði sem kalla má merkasta óþekkta höfund íslenskra bókmennta. 
Viðar Hreinsson (f. 1956) er sérfræðingur í
umhverfishugvísindum við Náttúruminjasafn
Íslands og stundar rannsóknir á náttúruskyni,
birtingarmyndum náttúru og menningarlegri fjölbreytni
í íslenskum bókmenntum fyrri alda. Hann lauk BA prófi í
íslensku frá Háskóla Íslands 1980 og mag. art. prófi
í bókmenntafræði frá
Kaupmannahafnarháskóla árið 1989. Hann kenndi við
framhaldsskóla í tvö ár og í tvö ár við
Manitobaháskóla en var síðan sjálfstætt starfandi
fræðimaður um langt árabil, lengst af við
ReykjavíkurAkademíuna og var þar einnig
framkvæmdastjóri á árunum 2005 til 2010.
Árið 2005 hafði hann frumkvæði að verkefninu
Svartárkot, menning − náttúra og hefur unnið að
því síðan.Viðar ritstýrði rómuðum enskum þýðingum Íslendingasagna, hefur lengi unnið að rannsóknum á íslenskri bókmennta- og menningarsögu og birt fjölda fræðigreina á Íslandi og erlendis og ritað nokkrar ævisögur. Ævisaga Stephans G. Stephanssonar, sem einnig er til í enskri gerð, hlaut tilnefningar og verðlaun á Íslandi og vestanhafs. Bók um Jón Guðmundsson lærða (1574 − 1658), Jón lærði og náttúrur náttúrunnar, sem kom út 2016, er jafnt ævisaga, hugmyndasaga, vísindasaga og aldarfarslýsing. Hún var tilnefnd til Íslensku bókmenntaverðlaunanna og hlaut Viðurkenningu Hagþenkis 2016. Hann er nú að ljúka ritun bókar um náttúrusýn í íslenskri sagnalist frá landnámi til siðaskipta. Viðar hefur verið virkur í baráttu um náttúruvernd í áratugi. | |
| |