|
11. október 2023. Fréttatilkynning frá
Listasafni Sigurjóns Ólafssonar Smellið hér til að skoð í vafra − Texti eingöngu Hildigunnur Einarsdóttir mezzósópran og Guðrún Dalía Salómonsdóttir píanóleikari Tónleikar í Listasafni Sigurjóns Ólafssonar 17. október kl. 20:00  Þær Hildigunnur Einarsdóttir mezzósópransöngkona og Guðrún Dalía Salómonsdóttir píanóleikari bjóða í franskt ferðalag á tónleikum í Listasafni Sigurjóns, þriðjudagskvöldið 17. október kl 20. Farsælt samstarf þeirra Guðrúnar og Hildigunnar spannar nú áratug, en þær hafa meðal annars lagt áherslu á flutning íslenskrar tónlistar, gjarnan í nýrri kantinum. Á þessum tónleikum kafa þær hinsvegar niður í hljóðheima franskrar tónlistar. Þær munu flytja, allt frá dularfullum síðrómantískum sönglögum Duparcs og dansandi grískum þjóðlagaútsetningum Ravels, yfir í sindrandi sönglög eftir Satie og þaðan yfir í nýrri hljóðheim Messiaen. Hildigunnur Einarsdóttir mezzósópran lauk burtfararprófi frá Söngskólanum í Reykjavík undir handleiðslu Ólafar Kolbrúnar Harðardóttur og Signýjar Sæmundsdóttur og stundaði framhaldsnám í Þýskalandi og Hollandi hjá Janet Williams og Jóni Þorsteinssyni. Einnig hefur hún lokið B.A. prófi í skapandi tónlistarmiðlun frá Listaháskóla Íslands hvar hún sótti söngtíma hjá Hlín Pétursdóttur Behrens. Hildigunnur stjórnar Árkórnum í Reykjavík og Kvennakórnum Kötlu ásamt Lilju Dögg Gunnarsdóttur. Hún kennir söng við Tónskóla Sigursveins D. Kristinssonar og Söngskólann Domus Vox. Hildigunnur hefur verið áberandi í kirkjutónlistarsenunni og sungið einsöngshlutverk, meðal annars Messías og Judas Maccabeus eftir Händel, Mattheusarpassíu, Jóhannesarpassíu og Jólaóratoríuna eftir Bach og Guðbrandsmessu eftir Hildigunni Rúnarsdóttur. Þá hefur hún einnig sungið einsöng, meðal annars með Sinfóníuhljómsveit Íslands, Barokksveitinni Brák og Kammersveit Reykjavíkur og frumflutt fjölda verka, til dæmis eftir Hreiðar Inga Þorsteinsson, Ingibjörgu Ýri Skarphéðinsdóttur og Kolbein Bjarnason. Hildigunnur hlaut Íslensku tónlistarverðlaunin 2023 fyrir söng ársins í flokknum sígild og samtímatónlist. Guðrún Dalía Salómonsdóttir píanóleikari er virk í íslensku tónlistarlífi sem einleikari í ýmsum hljóðfærahópum og ekki síður sem meðleikari söngvara. Hún stundaði píanónám við Tónlistarskólann í Reykjavík hjá Guðríði St. Sigurðardóttur og útskrifaðist frá Tónlistarháskólanum í Stuttgart og fór síðan í framhaldsnám til Parísar. Hún hefur hlotið fjölda styrkja og viðurkenninga, þar á meðal fyrstu verðlaun í píanókeppni EPTA. Guðrún hefur sótt fjölda námskeiða og einkatíma í ljóðaundirleik og leikið einleik með Ungfóníu og á tónleikum Sinfóníuhljómsveitar Íslands. Þá hefur hún leikið með ýmsum samspilshópum, eins og Kúbus, Kammersveit Reykjavíkur og Sinfóníuhljómsveit Íslands. Hún tekur reglulega þátt í tónleikaröðum, til að mynda Tíbrá í Salnum í Kópavogi, Sumartónleikum Sigurjónssafns, Klassík í Vatnsmýrinni, Óperudögum, Tónlist fyrir alla, Tónleikaröð Tónlistarfélags Akureyrar, Norrænum músíkdögum og Myrkum Músíkdögum, en þar hefur hún frumflutt fjölda verka eftir íslensk tónskáld. Út hafa komið geisladiskar með leik hennar með sönglögum Jórunnar Viðar og Karls Ottós Runólfssonar. Guðrún Dalía er píanóleikari við Tónlistarskóla Garðabæjar. | ||
| ||