|
Fréttatilkynning frá Listasafni Sigurjóns Ólafssonar 27.04.23
Smellið hér til að skoða í vafra Listasafni Sigurjóns Ólafssonar þriðjudagskvöldið 2. maí 2023 kl. 20:00 „ ..dalurinn hér kvað við af flautuspili smalanna sem kváðust á“ 
Síðari hluta 19. aldar gekk yfir bylgja frelsis og framfara í Suður
Þingeyjarsýslu sem átti sér hvergi líka hér
á landi. Snerti hún alla þætti
þjóðlífsins; verslun, landbúnað,
þekkingarleit og menningu. Alþýðan las
heimsbókmenntirnar, stjórnmál voru reifuð
og tónlist var stunduð.
Árið 1851 kom Mývetningur úr trésmíðanámi frá Kaupmannahöfn og flutti með sér fiðlu, þá fyrstu í sveit norðanlands að minnsta kosti, og kunnáttu til að leika á hana. Á þessum tímum voru komnir möguleikar á að panta vörur beint að utan og notuðu Þingeyingar sér það, meðal annars til að kaupa fiðlur og þeir lærðu hver af öðrum. Ötulastur var án efa Benedikt Jónsson − Bensi á Auðnum − sem var einn af þeim sem duglegastir voru að skrá þjóðlög fyrir Bjarna Þorsteinsson á Siglufirði. Í bréfi sínu til Bjarna segir hann: „ ... varð ég einna fyrstur til að útvega þau hljóðfæri og um leið útlendar nótnabækur og söngkennslubækur, og varð þá hreint og beint kapp á milli unglinganna að leika á fiðlu og flautu, svo dalurinn hjer kvað við af flautuspili smalanna sem kváðust á.“ 
Þriðjudaginn 2. maí 2023 kl 20:00 verður fjallað um þetta
sérstæða tímabil, og afleiðingar þess,
í Listasafni Sigurjóns Ólafssonar á Laugarnestanga.
Svava Bernharðsdóttir víóluleikari talar um doktorsverkefni sitt, „Saga og þróun fiðlu- og víóluleiks á Íslandi“, Hlíf Sigurjónsdóttir fiðluleikari um rit Garðars Jakobssonar og Páls H. Jónssonar „Fiðlur og tónlíf í Suður Þingeyjarsýslu“ og Herdís Anna Jónsdóttir víóluleikari segir frá reynslu sinni að alast upp á þessu svæði á síðustu áratugum liðinnar aldar og kynnum sínum af Garðari og fiðluleik hans. Leiknar verða upptökur af leik þeirra Garðars og Páls H. Jónssonar og í lokin leika flytjendur, ásamt Martin Frewer fiðlu- og víóluleikara, gömul fiðlulög úr Þingeyjarsýslu sem Páll H. Jónsson skráði og Martin hefur útsett. | |
| |